«Удинезе» Майк Менян билан бўлган воқеадан кейин уй ўйинини томошабинларсиз ўтказадиган бўлди. 

«Милан» дарвозабони шанба кунги баҳсда ирқчиликдан шикоят қилиб трибуна остига йўл олган ва ўйин маълум муддатга тўхтатилганди. Кейинчалик франциялик посбон ўз ҳаракатини трибунадан маймуннинг қичқириғини эшитгани билан изоҳлади.

Ўйиндан сўнг «Удинезе» ҳодисага алоқадор эканлиги аниқланган мухлисга бир умрга стадионга ташриф буюришни тақиқлаб қўйди.

Италия футбол федерациясининг спорт трибунали (FIGC) «Удинезе»га А Cериядаги навбатдаги уй ўйинини томошабинларсиз ўтказишни буюрди. Энди 3 феврал кунги «Монца» билан беллашувда трибуналар бўш бўлади. 

Суднинг таъкидлашича, ирқчилик кўринишлари туфайли ўйин икки марта — 1 ва 5 дақиқага тўхтатилган. Қичқириқларнинг аксарияти «Удинезе ултрас» вакилларидан келган, бироқ бошқа сектордаги мухлислар ҳам содир бўлаётган воқеаларга аралашган.