Андре Онана Гамбия миллий жамоасига қарши ўйин (3:2) олдидан Самуэл Это'О билан тортишиб қолган.

Sports News Africa хабар беришича, «Манчестер Юнайтед»нинг камерунлик дарвозабони беллашувда асосий таркибга киритилмаганидан ғазабланган.

Қайд этилишича, Онанани захирада қолдириш қарорини Камерун бош мураббийи Ригоберт Сонг қабул қилган.

Ўйин куни эрталаб дарвозабонга захирада қолиши ҳақида маълум қилинганидан кейин Онананинг жаҳли чиқди. У Это'О билан оғзаки жанжаллашган, аммо Камерун футбол федерацияси раҳбари Андренинг ғазабига ҳеч қандай муносабат билдирмаган.

Бунгача Онана 1-тур ўйинини (Гвинея, 1:1) ўтказиб юборган ва иккинчи ўйинда (Сенегал, 1:3) майдонга тушиб, дарвозасига йўналтирилган 3та зарбани ҳам қайтара олмаганди. 

Камерун Гамбия устидан қозонилган ғалаба эвазига гуруҳда 2-ўринни эгаллади ва 1/8 финалда Нигерия билан ўйнайдиган бўлди.