«Реал» бош мураббийи Карло Анчелотти Ла Лига 21-туридан ўрин олган «Алмерия»га (3:2) қарши ўйиндан сўнг ўз фикрлари билан ўртоқлашди. 

«Ғалати ўйин. Биринчи бўлимни жуда ёмон ўтказдик. Кечаги машғулотда вазиятни нотўғри баҳоладим. Жамоа чарчаган кўринарди. Иккинчи бўлим бошқача ўтди, бизни стадион қўллаб-қувватлади, бу жуда муҳим.

Чарчоқ, таркиб танлашдаги хатолар —  30-дақиқага келиб алмаштиришлар ҳақида ўйладим. Ўзимдан ғазабдаман. Ҳамма ўйнашни хоҳлайди ва ҳолати яхши эканини айтади. Биз ўйинчиларнинг ҳолатини баҳолашимиз керак эди ва буни нотўғри қилдик.

Биринчи бўлимни унутиш керак, ҳеч қандай баҳона йўқ. Мухлисларнинг ҳуштакбозлигини тушундим. Бу — мантиқий реакция. Бундай ўйнаб бўлмасди. 

Баҳсли вазиятлар? Мен қарорларни ВАР эмас, балки ҳакам қабул қилишига ишонаман. ВАР сигнал беради ва ҳакам қарор чиқаради. Менимча, у тўғри иш қилди. Ҳар кимнинг ўз фикри бор. Мен «Алмерия»нинг жаҳли чиққанини тушунаман, аммо бу 3та қарор тўғри эди. Бу ҳақда гапиришлари мумкин бўлган ҳамма нарсага тайёрман, ҳеч қандай муаммо йўқ», — дея италиялик мутахассиснинг сўзларини келтиради Marca.