Юрген Клопп Свен-Йоран Эрикссонга «Ливерпул»га бир кунлик бош мураббий бўлишни таклиф қилди.

Англия миллий жамоаси, «Рома», «Лацио» ва «Манчестер Сити» клубларининг 75 ёшли собиқ мураббийи аввалроқ ўзининг саратон касаллигига чалинганини ва узоғи бир йил умри қолганини айтганди. 

Швециялик мутахассис доим «Ливерпул»ни бошқаришни орзу қилган, у клубнинг ашаддий мухлисидир. Эрикссон март ойида «Аякс»га қарши афсоналар ўйинига «қизиллар» бош мураббийи этиб тайинланиши мумкинлиги ҳақида хабарлар бор эди. Бироқ Клопп уни асосий жамоага чақирди.

«Мен унинг «Ливерпул»га бўлган муҳаббати ва бутун умри давомида клубга мухлислик қилгани ҳақида энди эшитдим. 

Агар у бизга келса, жуда хурсанд бўламиз. Хоҳласа, офисимда ўтириб, кун давомида ўрнимга ишласин – муаммо йўқ.

Агар Свен келса, биз унга ҳамма нарсани кўрсатамиз. Ишончим комилки, у келиб, бу ерда ажойиб лаҳзаларни ўтказади», — дея «Ливерпул» бош мураббийининг сўзларини келтиради The Guardian.