«Барселона» бош мураббийи Хави Испания Суперкубоги финалида «Реал»дан учралган мағлубиятдан (1:4) сўнг ўз фикрларини билдирди. 

«Ўйинни яхшироқ назорат қилишимиз керак эди, финалда бундай ҳаракат қилиш мумкин эмас. Ҳимояда ҳам, прессингда ҳам етарлича ўйин кўрсата олмадик, финални эса 0:2 билан бошлаш мумкин эмас. Левандовски голи билан фарқни қисқатирди, аммо 1:3дан сўнг ўзимизга кела олмадик. 

Оғир мағлубият, ғазабдамиз. Бу мавсумдаги энг ёмон ўйинлардан бири бўлди. Совринларни қўлга киритиш учун сезиларли даражада ўсишимиз керак. Мухлислардан узр сўрашимиз керак, чунки финалда, класикода энг яхши томонларимизни кўрсата олмадик.

Имкон қадар ўзимизни танқид қилишимиз керак. «Барса» бундай кўринмаслиги керак, айниқса, финалда. Жамоа мухлиси сифатида ҳам ҳафсалам пир бўлди. 

Умидларимиз катта эди, иштиёққа тўла эдик. «Реал»нинг қарши ҳужумларини тўхтата олмадик. Бугун биз футболнинг аччиқ томонларини билиб олдик.

Фаолиятимда мағлубиятлар кўп бўлган, аммо якунда ўзимизни тиклай олганмиз. «Барселона» қайтади.

Бу ўйин бизга яхшироқ бўлишимизга ёрдам берсин. Олдинда бизни қийин кунлар ва кўплаб танқидлар кутиб турибди. Тан олишимиз керакки, финал даражасида эмасдик. Келинг, оёққа турайлик ва қолган совринлар учун ҳаракат қилайлик», — деди каталонияликлар устози Movistar эфирида.