«Анталяспор» Исроилни қўллаб-қувватлагани учун Сагив Ехезкелни дисквалификация қилди.

Кеча, 14 январ куни Туркия Суперлигасининг 20-туридаги «Трабзонспор»га қарши ўйинда (1:1) Ехезкел Хамаснинг Исроилга ҳужуми санаси – 7 октябр ёзилган бандажни кўрсатиб, голини нишонлади.

«Анталяспор» расмий  баёнотида Ехезкелнинг ҳаракатларини «мамлакат қадриятларига зид» деб атади ва раҳбариятнинг ҳужумчини дисквалификация қилиш қарорини эълон қилди. Клуб президенти Синан Бўзтепа исроиллик футболчининг шартномаси катта эҳтимол билан бекор қилинишини айтди.

«Мен гол нишонланган суратни кўрдим. Футболчи бизга қанчалик фойда келтирмасин, миллий қадриятларимиз ҳамма нарсадан устундир. Катта эҳтимол билан шартномани бекор қиламиз, у билан хайрлашамиз», — деди Бўзтепа.