ФИФА Бразилия ва Аргентина миллий жамоаларини ўйин олдидан юзага келган тартибсизликлар учун жаримага тортди.

22 ноябр куни ЖЧ-2026 саралаш босқичидан ўрин олган Бразилия – Аргентина (0:1) баҳси «Маракана»даги тартибсизликлар туфайли 27 дақиқа кечикиш билан бошланди. Мадҳияларни куйлаш вақтида бразилиялик ва аргентиналик мухлислар бўлган трибуналарнинг бирида тўқнашув юз берди. Полиция қаттиқ жавоб қайтарди ва мухлисларга қарши таёқлардан фойдаланди. Бундан норози бўлган аргентиналик футболчилар трибуна остига йўл олишди. 

ФИФА Бразилия футбол конфедерациясини «стадионда тартибни сақламагани» учун 50 000 Швейцария франки (58 800 доллар) миқдорида жаримага тортди.

Аргентина футбол ассоциациясига «стадион ичидаги ва ташқарисидаги тартибсизликлар» учун 20 000 Швейцария франки (23 500 доллар) миқдорида жарима солинди. 

Бундан ташқари, Аргентина миллий жамоаси Эквадор (1:0) ва Уругвай (0:2) билан уй ўйинларида мухлисларнинг ирқий камситишлари учун жазоланди. 

Энди АФА дискриминацияга қарши дастурга 50 000 Швейцария франки (58,8 минг доллар) сармоя киритиши керак. Саралашдаги навбатдаги уй ўйинида, яъни сентябрда Чилига қарши баҳсда аргентиналиклар стадионни фақат ярмини тўлдиришлари мумкин.