«Осасуна» дарвозабони Испания Суперкубоги «класико»лар сонини кўпайтириш учун ташкил этилган деб ҳисоблайди. 

Эслатиб ўтамиз, кеча Испания Суперкубоги яримфиналидан ўрин олган «Осасуна» – «Барселона» баҳсининг 59-дақиқасида Роберт Левандовски ҳисобни очган, Памплона клуби футболчилари эса Андреас Кристенсен голдан олдин Хосе Арнаизга нисбатан қўполлик ишлатганига норозилик билдиришганди. Бироқ бош ҳакам Алехандро Муниз голни ҳисоблади.   Якунда эса ўйин «Барса» фойдасига ҳал бўлди — 2:0.

«Суперкубок «Реал» ва «Барса» ўйини учун ташкил этилган. Буни кўрмаган одам футболни тушунмайди. Сабабини тушунмаяпман, лекин Саудия жамоатчилиги бу икки жамоани кўришни хоҳлайди, шунинг учун уларга кўпроқ пул тўлашади. Бу — нормал ҳолат», — дейди Серхио Эррера.

Дарвозабон Испания Суперкубоги Саудия Арабистонида ўтказилаётганидан ҳам норозилигини билдирди.

«Мухлисларимиз ушбу турнирни кўришлари керак. Биз испан жамоаларимиз ва испан мухлислари бу футболчилардан завқ олишлари керак. Лекин биз бу ерга келдик, чунки бу — бизнинг касбимиз. Шундай давр», — деди Эррера.

Аввалроқ Испания Суперкубогининг биринчи яримфиналида «Реал» «Атлетико»ни мағлуб этганди (5:3).