Хуан Мартинес Мунуэра Испания Суперкубоги финалидаги класикони бошқаради.

41 ёшли ҳакам фаолиятида 4-бор «Барселона» ва «Реал» ўртасидаги баҳсда ишлайди. 

Мунуэра ишлаган олдинги ўйинларда мадридликлар икки, «Барса» бир бор ғалаба қозонган: 2020/21 йилги мавсумда Мадрид клуби «Камп Ноу»да 3:1 ҳисобида устун келган, 2021/22 йилги мавсумда каталонияликлар рақибларини «Сантияго Бернабеу»да 4:0 ҳисобида енгишган, ўтган мавсумда эса «Реал» Испания Кубогининг яримфиналида «Камп Ноу»да «Барса»ни 4:0 ҳисобида мағлуб этди. 

Шу билан бирга аввалроқ иккала клубда ҳам ушбу ҳакам ишидан шикоятлар бўлган. «Барса» биринчи класикода Клеман Лангленинг Серхио Рамосга нисбатан қўполлигига ВАР ёрдамида белгиланган пенальтидан норозилик билдирган. Шунингдек, Лионел Мессининг 2020 йилда «Атлетико»га қарши Испания Суперкубоги яримфиналида урган голи қўл билан ўйин дея инобатга олинмагани шикоятга сабаб бўлган. 

«Реал» 2021 йилда Мунуэранинг «Севиля»га қарши баҳсдаги ишидан норози бўлган — ўшанда ҳакам ВАР тизимидан фойдаланиб, Мадрид фойдасига пеналтини бекор қилган ва, аксинча, Эдер Милитаони қўл билан ўйнади деб баҳолаб, «қаймоқранглилар» дарвозасига 11 метрлик жарима зарбаси белгилаган. 

Мадрид клуби телевидениеси ушбу мавсумда ҳам икки марта Мартинес Мунуэрадан норозилигини билдирган. Ноябр ойида клуб ТВси «Райо Валекано»га (0:0) қарши ўйинда ҳакам ишини танқид қилганди. Декабр ойида эса Хуан ВАР ҳаками этиб тайинланган «Гранада» билан ўйин олдидан Мадрид клуби реферининг «адолатсиз» қарорлари акс этган видеони эълон қилганди.

Бу мавсумда Мунуэра жамоаларнинг биттадан ўйинида ишлади — «Реал»нинг «Райо Валекано» билан ўйинида (0:0) ва 
«Барселона»нинг «Атлетик»ка қарши баҳсида (1:0).

14 январ куни «Реал» ва «Барселона» ўртасидаги Испания Суперкубоги финали бўлиб ўтади. Беллашув Тошкент вақти билан соат 00:00да бошланади.