«Барселона» бош мураббийи Хави Испания Кубоги 1/16 финалидан ўрин олган «Барбастро»га (3:2) қарши ўйинда жамоа концентрацияни йўқотгани ҳақида гапирди. 

«Кўпроқ курашишимиз керак эди. Биринчи бўлимни ишончли ўтказдик, ҳаммаси яхши кетаётгандек туюлди, аммо бундай баҳслар ҳар доим оғир кечади ва кутилганидан ҳам қийинроқ бўлиб чиқди. Лекин биз 1/8 финалдамиз ва мақсадимизга эришдик.

Бизга концентрация етишмади. Ўйинни назорат қилдик, аммо хатоларимиз билан ўзимизга қийинчилик туғдирдик. 

Фелишнинг голи офсайд туфайли бекор қилинди... Менга тўп қоида бўйича киритилганини айтишди. Афсуски, бу турнирда видеотакрорлар йўқ, буни тушунолмаяпман, ҳатто қуйи лигадаги стадион бўлса ҳам», — дея каталонияликлар устозининг сўзларини келтиради Marca. 

Беллашувни Хуан Сантана етакчилигидаги ҳакамлар бригадаси бошқариб борди.