Муҳаммад Салоҳ АПЛ 20-тури доирасидаги «Нюкасл»га қарши ўйинда (4:2) пеналтидан фойдалана олмаганидан кейин бутсаларини алмаштирди.

«Ливерпул» вингерининг биринчи бўлимдаги 11 метрлик жарима зарбасини рақиб дарвозабони Мартин Дубравка қайтарди. Танаффусда бутсасини алмаштирган мисрлик футболчи иккинчи бўлимда дублга эришди,  голларидан бирини пеналтидан урди. 

«Танаффусда биз бой берилган имкониятларни муҳокама қилдик. Пеналтини уролмадим. Бундай тарзда миллий жамоага кетишни (Африка Кубогига йўл олади) хоҳламадим.

Биринчи пеналти вақтида дарвозабон ҳаракат қилгани учун саросимага тушдим. Иккинчисини худди машғулотдагидек амалга оширдим.

Кечаги машғулотлардан янги бутса кийгандим. Бугун 1-бўлимда ноқулайлик ҳис қилдим, шу сабаб танаффусда уларни алмаштирдим ва тинчландим», — дея Салоҳнинг сўзларини келтиради ВВС.