Ўз тарихидаги биринчи мавсумдаёқ Туркманистон чемпионига айланган «Аркадаг» футбол клуби мамлакат кубогига ҳам эга чиқди.

Туркманистон кубоги учун кечган финалда «Аркадаг» клуби бу йил ОЧЛ иштирокчиси бўлган «Ахал» жамоасини йирик ҳисобда мағлуб этди – 3:0.

Шунингдек, Туркманистоннинг иккинчи президенти, Миллий кенгашнинг Халқ маслаҳати палатаси раиси Гурбангули Бердимуҳаммедов шарафига номланган янги жамоа Туркманистон чемпионати жорий мавсумида 24 ўйинда 24та ғалабага эришиб, турнирни максимал очко билан якунлаган жамоа сифатида рекорд қайд этди. Аркадаг шаҳри жамоаси кубокда ҳам 100 фоизлик натижа кўрсатган.

Қайд этиш жоиз, Владимир Байрамов шогирдлари 2023 йилда фақат бир ўйинда ғалабага эриша олмаган – Шимолий Македония 2-лигаси вакили «Беса Добердол» клубига қарши ўртоқлик баҳсида дуранг (1:1) қайд этилганди.

«Аркадаг» клубининг чемпионлиги шарафига Туркманистон президенти Сардор Бердимуҳаммедов жамоа футболчиларига «MAN RR3 19.440 EEV» автобусини совға қилган.

Маълумот учун, «Аркадаг» чемпионатда 72 очко билан 1-ўринни, «Алтин Асир» 54 очко билан 2-ўринни, «Балкан» жамоаси 43 очко билан учликдан жой олган. «Ахал»га 4-ўрин насиб қилган.