2023 йилги футбол мавсуми якунларига кўра, «Нефтчи» клуби бош мураббийи Виталий Левченко Суперлига-2023нинг энг яхши мураббийи деб топилгач, аксарият мухлис ва ҳаттоки мутахассислар чемпионатда 5-ўринни эгаллаган жамоа устози совринга муносиблигини шубҳа остига ола бошлашди. Қуйида фарғоналиклар бош мураббийи нега эътирофга муносиблиги ҳақида сабабларни келтирамиз.
1. «Нефтчи»ни Про лигага тушиб кетишдан қутқарди
Бу йилги «Нефтчи»нинг пойдевори ўтган мавсумда қўйилганди. Суперлига 2022 йилги мавсум 1-даврасидан кейин «Нефтчи» клуби турнир жадвалида 13-турдан кейин 11 очко тўплаб, «Динамо» билан қуйи лигага равона бўлиш учун асосий даъвогар сифатида тилга олина бошланганди.
2-давра олдидан Фарғона клуби Виталий Левченкони бош мураббий этиб тайинлагач, «Нефтчи» таркиби жиддий ўзгаришсиз, қисқа фурсатда ўйин жиҳатдан катта ўсишга эришди. Тожикистонлик мутахассис бошқарувида Фарғона клуби лигада қолиш билан бирга 2-даврада 19 очко жамғариб, жами 32 очко билан мавсумни 9-ўринда якунлаганди. Мураббий ўтган мавсумнинг 2-даврасида энг яхшилардан бирига айланди, аммо клубнинг жадвалдаги ўрни унинг лауреатлар сафидан ўрин олишига тўсиқ бўлганди.
2. Исмоиловнинг кетиши, Туроповнинг ўсиши
Суперлига-2023 йилги мавсуми олдидан Левченконинг «Нефтчи»сида етакчи ҳисобланган Аброр Исмоилов молиявий имконияти каттароқ бўлган «Навбаҳор» томонидан Наманганга олиб кетилди.
Левченко эса Самвел Бабаянга керак бўлмаган Диёр Туроповни «Навбаҳор»дан «Нефтчи»га таклиф этиб, уни жамоанинг энг яхши ўйинчисига айлантирди – 24 ўйинда 4та гол ва 3та ассист.
3. Муаммоларни енгиб ўтиш
«Навбаҳор»га керак бўлмаган яна бир футболчи Нурулла Тўхтасинов ҳам «Нефтчи»га ўтиб, жамоа етакчисига айланди. Аммо Левченко жамоаси 1-ўринда бораётган бўлса-да, молиявий сабаблар туфайли Тўхтасиновни ўз таркибида олиб қололмади. Унинг «Нефтчи» билан йил охиригача тузган шартномаси билан боғлиқ молиявий муаммоларни Малайзия клуби ўз маблағи ҳисобига ҳал этишга розилик билдиргач, футболчи «Теренггану» клубига кетиб қолди.
Виталий Григорьевич мавсум давомида қийин вазиятда қолиб, етакчи ўйинчисини таркибда олиб қололмаган бўлса-да, чемпионлик учун курашишда давом этди. Тўхтасиновнинг ўрнига бошқа ўйинчи топиш керак бўлган пайтда эса ЎФА қошидаги футболчиларнинг мақоми ва ўтиши бўйича қўмитаси қарздорликлар туфайли Фарғонанинг «Нефтчи» клубига трансфер тақиқини қўйганди.
4. Левченкодан грузиялик тўпурарнинг «ўғирланиши»
Виталий Левченко жорий йилда клубининг «қўли калта»лиги сабабли ёзги трансфер ойнасида ҳам Самвел Бабаян бошчилигидаги «Навбаҳор» томонидан жиддий «ҳужум»га учради.
Левченко Грузиядан таклиф этган Тома Табатадзе Суперлига 1-даврасида энг яхши ҳужумчига айланиб, 13 ўйинда 6та гол киритиб тўпурарлар сафига киргач, «Навбаҳор» устози фарғоналиклар ҳужумчисига «кўз олайтира» бошлади. Якунда эса молиявий ҳолатдан фойдаланиб, асосий рақобатчисининг голеадорига катта маош таклиф қилган ҳолда Табатадзени ҳам Наманганга олиб ўтди. Грузинда эса пасайиш кузатилди – Суперлигада 10 ўйинда 3та гол киритди.
5. «Нефтчи» Суперлигада октябр ойигача мағлубият нималигини билмади
Виталий Левченко мавсум давомида таркибдаги турли муаммолар сабабли ўзи истаган ўйинчилар билан тўп сура олмаган бўлса-да, Фарғона клуби октябр ойигача Суперлиганинг енгилмас жамоаси бўлиб турди. Водий клуби 7 октябр кунига келиб Қаршида «Насаф»га қарши илк мағлубиятини (0:2) тан олди.
6. 8 йил ичидаги энг яхши натижасига эришди
Левченко қўл остида Фарғона клуби мавсум якунида чемпионлик курашидан чиққан бўлса-да, жамоанинг 5-ўринни эгаллагани катта ютуқ эди. Сабаби «Нефтчи» сўнги марта 2001 йилда 1-даврани мағлубиятсиз тарзда ўтказган, қолаверса, клуб бешликдан жой олиб, сўнгги 8 йил ичидаги энг яхши натижасига эришганди.
7. «Нефтчи» рақобатчиларидан энг кўп очко олди
«Нефтчи» Суперлига якуний турнир жадвалида 5-ўринни эгаллаган бўлса-да, молиявий жиҳатдан ўзидан юқори бўлган тўртта рақобатчиси билан баҳсларда устунликка эришди.
Виталий Левченко шогирдлари турнирда «Пахтакор»ни икки ўйинда ҳам мағлуб этган ягона жамоага айланишди. «Навбаҳор» билан икки ўйинда ҳам дуранг қайд этди, «Насаф»ни Фарғонада енгган бўлса, сафарда ютқазди, ОКМК билан икки ўйинда ҳам дуранг қайд этди. Шу тариқа, «Нефтчи» ва «Насаф» топ-5ликдаги жамоалар билан ўзаро баҳсларда энг кўп – жами 13 очкодан тўплашди.
Шу фактларнинг ўзи ҳам Виталий Левченконинг Суперлигада йил мураббийи дея тан олинишига етарли бўлса керак. 2024 йилги мавсумда клуб таркиб бўйича барқарорликка эга бўлса, 51 ёшли мутахассис «Нефтчи»ни чемпионлик сари етаклай олишига ишониш мумкин.
Усмон Ибодов