Самарқандда старт олаётган шахматнинг блиц ва рапид йўналиши бўйича жаҳон чемпионати олдидан ўтказилган матбуот анжуманида ФИДE президенти Аркадий Дворкович ҳам иштирок этди.

Халқаро шахмат федерацияси раҳбари тезкор шахмат бўйича кетма-кет сўнгги жаҳон чемпионатлари мезбонлиги Марказий Осиё мамлакатларига тоширилаётгани ҳақидаги саволга учта сабабни келтирди. Шунингдек, у шахматнинг асл ватани қаер экани ҳақида ҳам гапирди.

«Жаҳон чемпионатларининг ФИДЕ томонидан Марказий Осиё мамлакатларига топширилаётганига учта факторни келтирсам бўлади.

Биринчи сабаб – Марказий Осиёда шахматнинг янги авлоди етишиб чиқяпти. Хусусан, буни Ўзбекистон мисолида кўряпмиз. Қозоғистонда ҳам аёллар ўртасидаги янги чемпионлар пайдо бўлмоқда.

Иккинчи сабаб сифатида, бу минтақадаги мамлакат раҳбарларининг шахматни ривожлантириш учун бераётган эътиборига ва бу спорт турининг қўллаб-қувватланаётганини келтирган бўлардим.

Учинчи сабаб сифатида бу мамлакатдаги ҳомийларнинг шахматни ривожлантириш учун қилаётган ишларини келтираман ҳамда жараён давом этса, бу спорт тури мамлакатда янги даражада ривожланади.

- Шахматнинг асл ватани дея, одатда Ҳиндистон тилга олинади. Аммо Сурхондарёдаги Далварзинтепа, Самарқанддаги қадимий Афросиёб тепаликларидан шахматнинг доналарига ўхшаш – шатранжлар топилган. Шундан келиб чиқилса, Ўзбекистонни шахматнинг тарихий ватани дея аташга асос борми?

- Шахматнинг пайдо бўлиши ҳақида кўплаб адабиётларни ўқиганман ва уларда шахмат доналари илк марта Ҳиндистонга яқин жойларда топилгани ҳақида фикрлар бор. Аммо сўнгги изланишлар ва замонавий архелогик топилмалар кўрсатадики, шахмат ўйини қадимдан Ўзбекистонга яқин ҳудудларда ҳам ривож топган», - дея ФИДЕ президентининг сўзларини келтиради Tribuna.uz мухбири.

Эслатиб ўтамиз, тезкор шахмат бўйича ЖЧ-2022 Қозоғистонда ўтказилган бўлса, 2023 йилги жаҳон чемпионати илк марта Ўзбекистонда ўтказилмоқда.