Туркия чемпионати 2-дивизионидан ўрин олган ўйинда футболчилар ўртасида катта муштлашув содир бўлди.

Ҳодиса 18-турдан ўрин олган «Бурсаспор» – «Диёрбакирспор» беллашувида юз берди.

«Диёрбакирспор» 2:0 ҳисобида ғалаба қозонган ўйинда иккинчи гол муаллифи бўлган меҳмонлар футболчиси Бунямин Гезер «Бурсаспор» аъзоси Чиғатой Йилмаз билан тортишиб қолди.

Йилмаз қизил карточка олганидан сўнг жамоа футболчилари ўртасида муштлашув бошланиб, унга полиция аралашишга мажбур бўлди. Муштлашув вақтида мухлислар трибунадан майдонга турли хил буюмларни улоқтиришган.

Воқеа оқибатида «Диёрбакирспор»нинг 3 ва «Бурсаспор»нинг 2 футболчиси қизил карточка олди. Шунингдек, «Бурсаспор» футболчилари «Диёрбакирспор» аъзоси кийиниш хонасига қочишга уринганида уни таъқиб қилгани маълум қилинди.