Туркия чемпионатида янги можаро бўлди. 

«Истанбулспор» президенти Туркия Суперлигасининг 17-туридан ўрин олган «Трабзонспор»га қарши ўйинда бош ҳакам Али Шансаланнинг қарорига рози бўлмагани учун футболчиларини майдондан олиб чиқиб кетди. 

Беллашувнинг 74-дақиқасида Фаик Сариалиўғли ва клубнинг бошқа вакиллари майдонга тушишди. Ўшанда 2:1 ҳисобида «Трабзонспор» ғалаба қозонаётганди. 

«Истанбулспор» футболчилари президентни ўйинни тўхтатмасликка кўндиришга ҳаракат қилишди. Ҳатто ҳимоячи Симон Дели унинг олдида тиз чўкиб: «Келинг, ўйинни давом эттирайлик», деди. Чунки бу ҳаракат сабаб клубдан жарима очколари олиб ташланиши мумкин (жамоа 8 очко билан сўнгги ўринда). 

«Истанбулспор» президентига 68-дақиқада рақиб ҳужумчиси Пол Онуачунинг голи ҳисоблангани ёқмади. Чунки голдан бироз аввал қўполлик кузатилган, ҳакам эса эътибор қаратмаганди.

Эслатиб ўтамиз, бунгача Туркия Суперлигаси 15-туридан ўрин олган «Анкарагужу» — «Ризеспор» ўйинидан сўнг (1:1) мезбонлар президенти Фарук Кожа ҳакам Халил Умутга мушт туширган. Унинг ортидан яна 2 киши ҳакамни тепкилаганди.