«Ливерпул» бош мураббийи Юрген Клопп АПЛ 17-туридан ўрин олган «Манчестер Юнайтед» (0:0) билан ўйиндан сўнг ўз фикрларини билдирди. 

«Жамоадан жуда яхши ўйин кўрдим. Менга ёқмаган ягона жиҳат — натижа. Гол уришимиз керак эди.

Баъзи нуқталарда шошиб қолдик, лекин менга шиддатимиз ва беллашувни қандай бошлаганимиз жуда ёқди.

Нима қилмоқчи эканимизни ҳамма кўрди. Қарши прессингимиз яхши бўлди – рақибга олдинга югуришга имкон бермадик.

«Манчестер Юнайтед»га қарши бундай доминант ўйинни эслай олмайман – ҳаттоки биз 7:0 ҳисобида ўйнаганимизда ҳам рақиб бугунгидан фаолроқ эди.

Ҳозир ҳисоб — 0:0. «МЮ» эса ўзини биздан бироз яхшироқ ҳис қилаётгандир. Лекин биз бир очкони қабул қиламиз ва давом этамиз.

Мен кутган ўйин бўлди. Агар шундай ўйнасак, рақиб ўз майдонини тарк этиши қийин бўлади. «МЮ» ҳимояси хатосиз ва иштиёқ билан ўйнади.

Гол урсангиз, ўйин динамикаси ўзгаради, рақиб бироз очилиб, таваккал қилади. Аммо бу содир бўлмади, рақиб қўлида бор нарсани ишга солди ва ҳисоб очилмади», — дея Клоппнинг сўзларини келтиради ВВС.