«Ливерпул» ҳужумчиси Коди Гакпо «Манчестер Юнайтед» билан ўйин олдидан ўтган мавсумда бу рақиб устидан эришилган 7:0 ҳисобидаги ғалаба ҳақида гапирди.

«Бу жамоамиз ижросидаги ажойиб ўйин эди. Ўшанда икки жамоа ҳам 1-бўлимда яхши ўйин намойиш этган, иккинчи бўлимда эса биз тўлиқ устунлик қилиб, голлар ургандик. Танаффусга яқин ҳисобни очгандим, 2-бўлим бошида Дарвин гол киритди, 2 дақиқа ўтиб мен дублга эришгандим. Шу тариқа, ўйиндаги интригани ўлдирганимиздан кейин рақиб таслим бўлганди.

Шунақа пайтларда ҳисобга ҳам қарамай қўясан ва шунчаки ўзингнинг энг яхши жиҳатларингни кўрсатишга уринасан. Айнан ўша баҳсда бутун жамоа ажойиб ўйнаганди. Умид қиламанки, биз буни такрорлай оламиз», - дейди «Ливерпул»нинг нидерландиялик ҳужумчиси.

Маълумот учун, «Ливерпул» – «Манчестер Юнайтед» учрашуви бугун, 17 декабр соат 21:30да бошланади. Клопп шогирдлари турнир жадвалида пешқадамлик қилаётган бўлса, «МЮ» 10 очколик фарқ билан 7-ўринда бормоқда.