Майдонда ҳушини йўқотган «Лутон» футболчиси ўзига келди.

Бугун АПЛ 17-тури доирасидаги «Борнмут» — «Лутон» баҳси 65-дақиқада меҳмонлар ҳимоячиси Том Локер ҳушини йўқотиб, майдонга йиқилгани туфайли 1:1 ҳисобида тўхтатилганди. Футболчини замбилда олиб чиқиб кетишди.

«Лутон» Локер ҳушига келганини маълум қилди.

«Ҳаммамиз энг яхшисига умид қиламиз. Ҳушига келган ва касалхонага ётқизилган сардоримиз Том Локер учун дуо қилишда давом этамиз. 

Ҳозирча барча тафсилотларни билмаймиз, лекин биз «Борнмут»га, умуман, иккала жамоанинг тиббий ходимларига тезкор ёрдамлари учун миннатдорчилик билдирамиз. 

Стадиондаги мухлислардан узр сўраймизки. Ҳар икки клуб футболчилари дўсти ва жамоадоши майдондан шундай тарзда олиб кетилганидан кейин ўйинни давом эттириш учун тўғри эмоционал ҳолатда эмасди. Мураббийлар ҳам бундай шароитда давом эта олишмади.

Биз барчага Локерни олқишлагани ва унинг исмини бутун стадион бўйлаб куйлагани учун миннатдорчилик билдирамиз. Футболчилар, мураббийлар ва мухлислар, Том ва унинг оиласига севгимизни кўрсатиш ва қўллаб-қувватлаш вақти келди. Бизнинг фикру-хаёлимиз у билан», — деди «Лутон» баёнотида.

Локер бу йил иккинчи бор шундай муаммога дуч келди. Уэлслик 29 ёшли футболчи 27 май куни Чемпионшипда «Ковентри»га қарши ўйин вақтида ҳам йиқилиб тушган, июн ойида эса юраги операция қилинган эди.