ФИФА расмий сайти 2023 йилнинг энг яхши мураббийи номини қўлга киритиш учун номзодларнинг якуний учлигини эълон қилди.

The Best шорт-листи якуний учлигидан Пеп Гвардиола («Манчестер Сити»), Симоне Индзаги («Интер») ва Лучано Спаллетти («Наполи» / Италия) сингари мутахассислар жой олган.  

Бунгача бешликдан ўрин олган Эндж Постекоглу («Селтик» / «Тоттенҳэм») ва Хави («Барселона») якуний учликка киритилмади.

Маълумот учун, 2022/23 мавсумда Гвардиола «Ман Сити» билан ЕЧЛ, АПЛ ва Англия кубогини қўлга киритган бўлса, Индзаги Италия кубогига эга чиқиб, «Интер» билан ЕЧЛда финалгача етиб келди. Спаллетти эса «Наполи» бош мураббийи сифатида А Серия ғолибига айланганди.

ФИФА ушбу соврин ғолибини 15 январ куни эълон қилади.