Суперлига жорий мавсуми якунига етгач, «Навбаҳор» билан хайрлашган Остон Ўруновнинг кейинги режалари маълум бўлди.

Элдор Шомуродовнинг агенти саналмиш Қаҳҳор Мўминов Россия нашрларига берган интервюсида Остон Ўруновнинг фаолияти ва кейинги фаолияти ҳақида гапирди.

«Остон – ҳозирда Ўзбекистон чемпионатидаги энг яхши ўйинчи. У «Ал-Ҳилол»га қарши баҳсларда Неймар, Малком ва Милинкович-Савич сингари ўйинчиларга қарши яхши ўйин намойиш этди. Ҳа, Россияда иши юришмаганди, чунки анча ёш эди. Қолаверса, ўсиш йўлини ҳам хато танлаганди. 

Ўрунов ҳозир бошқа одамга айланган. У уйланди, улғайди, анча босилди. У иқтидорли йигит. У қишгача уйида, Ўзбекистонда бўлади. Шахсан ўзи билан гаплашиб, тушундимки, Остон ўзини юқорироқ даражага синаб кўрмоқчи», - дейди россиялик футбол агенти.