«Ювентус» бош мураббийи Массимилиано Аллегри А Серия чемпионлигини қўлга киритиш имконияти ҳақида гапирди.

Турин клуби А Серия 15-турида «Наполи» устидан ғалабага (1:0) эришиб, 36 очко билан ҳозирча пешқадамга айланди.

«Скудетто орзуси? Амалдаги чемпион билан ўйинда ғалаба жуда муҳим эди, чунки бу орқали «Наполи»дан 12 очко узоқлашишга эришдик.

Биз шу руҳда давом этишимиз, аммо ўйинимиздаги техник хатоларга барҳам беришимиз керак. 

Биринчи бўлимда йигитлар яхши ўйин намойиш этди, аммо қийин вазиятларда жамоам мармар тошга ўхшаб қолмоқда», - дейди Аллегри.

Маълумот учун, «Юве»дан бир очко ортда қолаётган «Интер» бугун «Удинезе»га қарши майдонга тушади.