Жоржо Келлини Англия Премьер-лигаси ва Италия А Сериясини солиштирди. 

«Англияда ўйнаш ҳар қандай футболчи учун жуда қийин, чунки у ерда жисмонан 100 фоиздан кўпроқ тайёр бўлиш керак. Бу лига дунёнинг бошқа лигаларидан анча яхши. Бунга тезда мослаша оладиганлар кам. Ўйинчиларга, айниқса ёшларга вақт берилмайди.

Скамакка «Сассуоло»да бир йил жуда яхши ўйнади, лекин «Вест Ҳэм»да барқарор ўйнаб кетолмади. У — жуда яхши ўйинчи ва жамоа унга кўпроқ ишониши учун бироз вақт берилишига муносиб. Лекин мен у ерда кутмасликларини тушунаман, чунки ғалаба қозониш керак. Агар кучлироқ футболчи бўлса, уни ўйнатиш керак.

Маданий тафовутлар? Йўқ, гап бунда эмас. Агар Скамакка «Ювентус», «Интер» ёки «Милан»га ўтса ҳам, худди шундай бўларди. Унга вақт керак эди.

Италияда осонроқ бўлиши мумкин, чунки у чемпионат билан таниш, аммо «Вест Ҳэм» А Сериянинг энг яхши жамоаси билан тенг.

Смоллинг, Томори, Лофтус-Чикни кўрганмисиз? Жисмоний тайёргарлиги бўйича улар Италиядаги аксарият футболчилардан 3 баравар яхшироқ. Улар шундай устунликка эгаки, бу уларга рақибларини йўқ қилишга имкон беради. Бунга қаршилик кўрсатиш осон эмас», — деди ҳозирда «Лос-Анжелес»да ўйнаётган «Ювентус»нинг собиқ ҳимоячиси.