Англиянинг бир қатор нашлари билан ҳамкорлик қиладиган венгриялик журналист Бенц Бошак ЦСКА сафида тўп сураётган ўзбекистонлик футболчи Аббосбек Файзуллаевни Хвича Кварацхелиядан кейин Россия чемпионатидан топ-5 лигаларга йўл оладиган ўйинчи бўлиши мумкинлигини тахмин қилмоқда.

«Аббосбек Файзуллаевга эътибор қаратишни истардим. У жорий мавсум ЦСКАда ажойиб спорт формасига киришга улгурди.

20 ёшли ўйинчининг ҳаракатларини кузатиш жуда қизиқ. У рақиб жарима майдонида ақлли қарорлари билан кўзга ташланади. 

- РПЛдаги 11 ўйинда 
- 2 гол
- 5 ассист 

Шунингдек, у 20 ёшгача бўлган футболчилар ўртасидаги жаҳон чемпионатида ҳам Ўзбекистон U20 сафида 3 ўйинда 2та голга муаллифлик қилган.

Файзуллаев Россия Премьер-лигасида ўзини кўрсатиб, Европанинг топ-5 лигасига йўл олиши мумкин бўлган иккинчи Хвича Кварацхелияга айланиши мумкин», - дея ёзади Guardian, Goal, The Times каби нашрларда фаолият юритадиган Бенц Бошак «твиттер»даги саҳифасида.

Қайд этиш жоиз, Бошакнинг твиттердаги обуначилари орасида таниқли журналист ва инсайдер Фабрицио Романо ҳам бор.

Эслатиб ўтамиз, грузиялик Хвича ўтган мавсумлар давомида Россиянинг «Рубин» ва Грузиянинг «Динамо» Батуми клубларида фаолият юритиб, 2022 йилда «Наполи»га ўтган ва А Серияда 34 ўйинда 12та гол киритиб, жамоаси билан Италия чемпионига айланганди.

Маълумот учун, Аббосбек Файзуллаев сўнгги икки ойда ЦСКАнинг октябр ва ноябр ойидаги энг яхши ўйинчиси деб топилганди.