Осиё Чемпионлар лигаси 6-тури доирасида Криштиану Роналдунинг Марказий Осиёга келиши амалга ошмади.

Бугун, 5 декабр куни «Ал-Наср» ОЧЛ 6-тури доирасида Душанбеда «Истиқлол» меҳмони бўлади. Саудия Арабистони клуби душанба куни Тожикистонга етиб келди. Ўтган турда 1/8 финалга йўлланмани нақд қилган «Ан-Наср» бу учрашувга жамоа юлдузи Криштиану Роналдуни олиб келмаган. Клуб бунга сабаб сифатида португалиялик 38 ёшли ҳужумчи жароҳатидан тикланишга улгурмаганини келтирган.

Душанбедаги ўйинда Садио Мане, Талиска, Эмерик Лапорт, Марсело Брозович ва Алекс Теллес сингари юлдузлар иштирок этиши кутилмоқда.

Қайд этилишича, Душанбе клуби «Ан-Наср» билан ўйин чипталарини 10 кун аввал бошлаб, аллақачон сотишга улгурган. Чипталар секторига қараб 100 сомондан 3 минг сомонгача (тахминан 100 минг сўмдан 3 млн сўмгача) нархларда сотилган. 

Маълумот учун, «Истиқлол» - «Ан-Наср» ўйини соат 21:00да бошланиб, «Спорт» телеканали орқали намойиш этилади. Тожикистон чемпиони гуруҳда 2 очко билан 4-ўринда бормоқда ва кейинги босқичга чиқиш имкониятини йўқотиб бўлган.