«Навбаҳор» бош мураббийи Самвел Бабаян ОЧЛ 5-туридан ўрин олган «Ал Ҳилол» (0:2) билан ўйиндан сўнг ўз фикрларини билдириб ўтди. 

«Осиёнинг энг кучли жамоасига қарши ўйнадик. «Ал Ҳилол» — деярли идеал жамоа. Ҳимояда тартибли ўйнаб, тезкор қарши ҳужумларга ўтишни режалаштиргандик. Лекин хатоларга йўл қўйдик. Менимча, иккинчи пеналти баҳсли бўлди. Плей-оффга чиқиш имкониятимиз жуда яхши ва удан фойдаланишга ҳаракат қиламиз.

Мавжуд футболчилардан таркиб танладим. Қанотларда Исмоилов ва Собиржонов ўйнашди. Абдуманнопов шамоллаган ва тўлиқ тузалишга улгурмаганди. Кейинги баҳсларга қадар у тўлиқ соғайиб кетишига умид қиламан. Футболчиларга ҳеч қандай эътирозим йўқ. Яна такрорлайман: Осиёнинг энг кучли клубига қарши ўйнадик. Бундай рақибга қарши ҳужумкор ўйин кўрсатиш иложсиз. Улар чемпионатдаги сўнгги ўйинида 9та гол уришди.

Исмоилов агрессив ўйнади? У жуда яхши ҳаракат қилди. Бугун бизга ҳужумларни якунловчи етишмади. 

Мавсум сўнгида ўйинларимиз кўп. Захира ўриндиғи панд бермоқда. Ротация қилишим керак, бироқ захирада сифатли футболчилар етишмаяпти. Шунингдек, кўп ўйинчилар мавсум сўнгида чарчашган ва шамоллашган. 

Ёшлар? Улар U-21 мусобақасида сўнгги ўринда боришмоқда ва ҳали Чемпионлар Лигасига тайёрмас», — дея Бабаяннинг сўзларини келтиради Tribuna.uz мухбири.