«Манчестер Юнайтед» собиқ ўйинчиси Гари Невилл «Эвертон»га қарши ўйинда (3:0) манчестерликлар сафида Каземиронинг ўрнини эгаллаган 18 ёшли Кобби Майну ҳақида фикрини билдирди.

«Кобби кўпроқ «Манчестер Сити» футболчисига ўхшайди. Бу мен унга айтишим мумкин бўлган энг катта мақтов ва буни айтиш осон эмас. У мени тўғри тушунади деб ўйлайман. Фикримча, Пеп Гвардиола ўз жамоасида шундай футболчини кўришни хоҳлайди. Кобби эндигина 18 ёшда ва уни олдинда қийин синовлар кутиб турибди», - дейди Невилл.

Аввалроқ, яна бир собиқ ўйинчи Рио Фердинанд Майну «Эвертон» билан ўйинда жамоанинг энг яхши ўйинчиси бўлганини айтганди. Кобби АҚШдаги турнеда жароҳат олиб, уч ойдан буён майдонга туша олмаётган эди.

Маълумот учун, Майну 2021 йилдан буён «Манчестер Юнайтед» академияси тизимида тарбияланмоқда. Унинг клуб билан шартномаси 2027 йилгача имзоланган. Transfermarkt портали 18 ёшли футболчини 800 минг еврога баҳолаган.