Англия ўсмирлар жамоасининг ЖЧ-2023да Ўзбекистонга шов-шувли тарзда мағлуб бўлганидан кейин Liverpool.com сайти Мерсисайд клубининг трансферлар учун янги бозорларни ҳам ўрганиш вақти келгани ҳақида ёзмоқда.

«Ливерпул» клуби Англиянинг ўсмирлар ўртасидаги жаҳон чемпионатидаги шов-шувли мағлубиятидан кейин, «Манчестер Сити» ва «Челси» сингари клуб тарбияланувчиларидан устун келган ва тобора ўсишга эришаётган янги трансфер бозорини ўрганиши керак. 

Скаутинг глобал миқёсда кенгаймоқда ва шу билан бирга энди бўлажак футбол юлдузини дунёнинг исталган чеккасидан топиш мумкин. Ўтган мавсум гуржистонлик Хвича Кварацхелия Европанинг энг яхши ўйинчисига айлангани бунга мисол.

Халқаро ареналарда ҳам номдор мамлакат миллий жамоалари олдингидек гегемонлик қила олишмаяпти. Сўнгги жаҳон чемпионатида Япония Испания ва Германияни мағлуб этди, Марокаш эса яримфиналга чиқиб барчани ҳайратлантирди.

Бу воқеалардан бир йил ўтиб, Индонезиядаги U17 жаҳон чемпионатида ҳам шунга ўхшаш натижалар кузатилмоқда. Турнирнинг шов-шувли воқеаларидан бири Англиянинг мусобақадан чиқариб юборилгани бўлди. «Манчестер Сити» ва «Челси»нинг энг яхши ёш ўйинчиларидан ташкил топган «уч шерлар» 1/8 финалда кутилмаганда Ўзбекистонга мағлубиятга учради.

Кейинги босқич – чоракфиналда Ўзбекистон Францияга минимал ҳисобда ютқазган бўлса-да, бу жамоанинг Англияни турнирдан чиқариб юборгани ажойиб натижа ҳисобланади. Футболи тобора ўсаётган бу мамлакатнинг 20 ёшгача жамоаси ҳам яқинда жаҳон чемпионати плей-офф босқичига йўлланма олганди ва таркибида бўлажак юлдузларга эга. 

Ўзбекистон U17 жамоаси сафидаги энг умидли ўйинчиларидан бири Амирбек Саидов бўлиб, у Англия дарвозасига ҳам гол киритган ва ЖЧ-2023даги 5 ўйинда 4та голга муаллифлик қилди», - дейилади ўзбекистонлик ҳужумчини «Ливерпул» клубига тавсия қилган Liverpool.com сайти хабарида. 

Аввалроқ, инсайдер Фабрицио Романо Аргентина ўсмирлар жамоаси сафида турнирда 5та гол киритган ҳужумчи Клаудио Эччеверри бир қатор клубларнинг диққат марказида экани ҳақида хабар қилинганди.