ОЧЛ 5-тури доирасидаги «Ал-Иттиҳод»га қарши ўйин олдидан ОКМК бош мураббийи Миржалол Қосимов фикрлари билан ўртоқлашди.

«Эртага жуда катта жамоага қарши майдонга чиқамиз. Бу Олмалиқ шаҳри учун тарихий кун. Биласиз, 4-турдан кейин гуруҳдан чиқиш имкониятини тўла йўқотдик. Шу сабабли йигитларда ҳеч қандай босим йўқ.

Йўқотишларга келадиган бўлсак, Рубен Санчез ва Шоҳрух Гадоев жароҳат туфайли эртага бизга ёрдам бера олишмайди. Акром Комилов эса дисквалификация қилинган. 

Бундай катта номларни керак бўлса, пул тўлаб ҳам олиб келолмайсиз. Биз ўз меҳнатимиз эвазига буни уддаладик. Эртага стадионга мухлисларнинг катта оқими кутиляпти. Уларнинг олдида ёпиқ ўйин кўрсатсак ярашмайди. Бензема ёки қайсидир футболчини персонал равишда ёпишга эмас, жамоавий футбол кўрсатишга ҳаракат қиламиз», - дея Миржалол Қосимовнинг сўзларини келтирган ПФЛ расмий сайти.

Саудия клуби 9 очко билан пешқадамлик қилаётган бўлса, Олмалиқ клуби очкосиз сўнгги ўриндан жой олган. «Сипоҳон» ва «Эйр Форс» ҳисобида 7 очкодан мавжуд.

Маълумот учун, ОКМК - «Ал-Иттиҳод» баҳси 27 ноябр куни Олмалиқда соат 21:00да бошланади.