Гана парламенти депутати Магуайрдан кечирим сўради. «МЮ» ҳимоячиси узрни қабул қилди

Гана парламенти депутати Айзек Адонго 2022 йилда «МЮ» ҳимоячиси Ҳарри Магуайрни танқид қилгани ижтимоий тармоқларда кенг тарқалганди.

«Рақиб ҳужум қилиб гол ура олмаган тақдирда, Ҳарри Магуайр рақиб жамоа аъзоларининг ўрнига бу ишни бажариб беради. Мамлакатимиз иқтисодиётида ҳам зиён келтирадиган шундай инсон бор», - дея Гана бош вазири ўринбосарини танқид қилганди депутат.

Ушбу ҳафтада Адонго парламентдаги навбатдаги чиқишида англиялик ҳимоячидан узр сўраб, Магуайрнинг ҳозирга келиб «Манчестер Юнайтед» учун муҳим ўйинчига айланганини эътироф этди. Ганалик сиёсатчи бу ҳақда ижтимоий тармоқларда ҳам ёзгач, Магуайр «Узрингиз қабул қилинди. «Олд Траффорд»да кўришгунча», - дея жавоб қайтарди.

Маълумот учун, Ҳарри жорий мавсум клуби сафида жами 11 ўйинда майдонга тушиб, битта голга муаллифлик қилди. «МЮ» АПЛдаги сўнгги 5 ўйиндан 4тасида ғалабага эришди.