Ўзбекистон миллий жамоаси бош мураббийи Сречко Катанец ЖЧ-2026 саралашидан ўрин олган Эрон билан ўйин олдидан ўз фикрларини билдирди.

«Барчага хайрли кун. Йигитлар тайёр. Эртага муҳим ўйин кутмоқда. 

Эрон миллий жамоасини жуда ҳурмат қиламан. Дунёнинг энг кучли жамоалари ҳам улар билан қийналади. Бу — мен учун ҳам жиддий чақириқ. Бундай рақибга қарши футболчиларга ортиқча мотивация бериш шарт эмас. Ўзимизга ишонамиз. Ҳар бир ўйин 0:0дан бошланади. 

Охирги ўйинларда кўп гол уряпмиз. Хўш, эртага ҳам буни уддалай оламизми, кўрамиз. Биз учун синов. 

Туркманистон билар сунъий майдондаги ўйин? Тажрибамда бундай стадионлардан кўп жабр чекканман. Бу сафар катта муаммолар бўлмади. Эртага яхши майдонда ўйнаймиз. 

CAFA финалидаги мағлубият? У ўртоқлик мақомида эди. Нималарга қодирлигимизни эртага билиб оламиз. 2 йилдан бери бу жамоа билан ишлаяпман. Йигитларни биламан, улар ҳам ўз кучларини билишади.  

Эртанги ўйин умуман бошқа даража. Рақиб футболчилари анчадан бери бирга ўйнашади ва хатоларни кечиришмайди. Лекин фақат биз эмас, Эрон ҳам хавфсираши керак. 

Туркманистон (3:1) устидан иродали ғалаба? Келинглар, яхшиси, ўша ўйин ҳақида эмас, Эрон ҳақида гаплашайлик. Ўша баҳсда захирадан тушганлар ғалабамизга замин яратишди. 

Отабек Шукуров кўп гол уряпти? Ҳа, энди уни Элдор Шомуродов ўрнига қўяман (кулади). 

Албатта, Оташ сўнгги ўйинларимизда кўп гол ураётганидан фақат хурсандман. Доим яримҳимоячиларга ҳужумга қўшилишни айтаман, лекин чарчаганда бундай қилиб бўлмайди. Вазиятдан келиб чиқилади. 

Жамоа руҳиятида яхши томонга ўзгариш бўляпти? Бу борада кўп гапиришни, мақтанишни хоҳламайман. Ҳақиқий синовлар олдинда. Гап футболчиларда ҳам. Улар ментал жиҳатдан кучли клубларда ўйнашса, бу миллий жамоага ҳам фойда беради», — дея словениялик мутахассиснинг сўзларини келтиради Tribuna.uz мухбири.

Ўзбекистон — Эрон ўйини 21 ноябр куни «Бунёдкор» стадионида бўлиб ўтади. Беллашув Тошкент вақти билан 18:00да бошланади.