Микел Артета «Арсенал»нинг «Нюкасл»га қарши ўйинидан кейин ҳакамларни ҳақорат қилганликда айбланмоқда. 

Англия футбол ассоциацияси (ФА) «Арсенал» бош мураббийига қарши айбловлар қўйиб, Артетанинг сўзлари «ўйин расмийларини ҳақоратлаш ва футболга зарар етказиш» эканлигини маълум қилди. Мураббийнинг хатти-ҳаракати «номақбул» деб топилди. 

Микел сешанба кунигача айбловларга жавоб бериши керак.

Эслатиб ўтамиз, «Нюкасл»дан учралган мағлубиятдан сўнг (0:1) «Арсенал» устози Стюарт Атвеллнинг ҳакамлиги ва рақибнинг голини ҳисоблаш қарорини қаттиқ танқид қилганди: «Нюкаслнинг голи бекор қилинмаган дунёдаги энг яхши лигада эканлигимдан уяляпман. 20 йилдан бери шу юртдаман, ҳозир уяляпман. Шармандалик».

Кейинчалик «Арсенал» ҳам ўз баёнотида мураббийни қўллаб-қувватлаганди: «Қабул қилиб бўлмайдиган хатолар. Премьер-лига — дунёдаги энг зўри ва у яхшироқ ўйинларга лойиқ». 

Шунингдек, «Арсенал» ҳакамларга рақиб фойдасига қилинган хатолар рўйхатини тақдим этишни режалаштираётгани хабар қилинганди.