Бугун, 13 ноябрдан Тошкентда профессионал бокс оламидаги энг нуфузли ташкилот – Бутунжаҳон бокс кенгашининг (WBC) 61-конвенцияси ўз ишини бошлади. 

МОҚ хабарига кўра, ушбу йирик ташкилотнинг бундай тадбири нафақат мамлакатимиз, балки Марказий Осиё минтақасида биринчи бор ташкил этилмоқда. Унда дунёнинг 100га яқин мамлакатидан делегатлар иштирок этяпти. 

«Hilton» меҳмонхонасида ўтган очилиш маросимида Бутунжаҳон бокс кенгаши президенти Маурисио Сулаймон, жаҳон боксининг собиқ юлдузлари Эвандер Ҳолифилд, Константин Цзю, Артур Григорян, Ўзбекистон Республикаси Бош вазирининг ўринбосари, мамлакат бокс федерацияси раиси Очилбой Раматов, Ёшлар сиёсати ва спорт вазири Адҳам Икрамов, Ўзбекистон профессионал бокс федерацияси васийлик кенгаши раиси Қудратилла Рафиқов, Осиё Олимпия кенгаши вице-президенти Отабек Умаров, Ўзбекистон профессионал бокс федерациясининг биринчи вице-президенти Ғофур Раҳимов, Ўзбекистон Миллий Олимпия ва Паралимпия қўмитаси раҳбарияти ва жаҳон бокси юлдузлари иштирок этишди.

Аввалроқ, мазкур конвенция доирасида ўтказиладиган профессионал бокс мусобақаларида ўзбекистонлик боксчилар Баҳодир Жалолов, Абдумалик Халаков, Қудратилла Абдуқаҳҳоров, Миразизбек Мирзахалиловларнинг чет эллик рақиблари билан жанги ҳам режалаштирилгани хабар қилинганди. Шунингдек, таниқли боксчилар – Тайсон Фьюри, Василий Ломаченко каби машҳур боксчилар ҳам 12 ноябрда Тошкентга етиб келиши, Майк Тайсон эса 16 ноябрь куни пойтахт аэропортида кутиб олиниши маълум қилинганди. Тадбир 17 ноябргача давом этади.

Маълумот учун, 1963 йилда асос солинган Бутунжаҳон бокс иттифоқи профессионал бокснинг энг нуфузли йўналиши ҳисобланиб, унинг бош қароргоҳи Мексикада жойлашган. Ўтган йили ташкилотнинг юбилей – 60-йиллик конвенцияси Мехико шаҳрида ўтказилган ва айнан ўша тадбирда 61-конвенция мезбонлиги Ўзбекистонга ишониб топширилган эди.