«Реал»нинг собиқ бош мураббийи ва яримҳимоячиси Зинедин Зидан Адидас ташкил этган лойиҳа доирасида «Интер Майами»нинг аргентиналик форварди Лионел Месси билан суҳбатлашди.

Суҳбат аввалида Зидан ёрдамчиларидан тўпни беришни сўради ва суҳбатдошига юзланди.

«Бирга ўйнай олмаганимиз ачинарли. Лекин мана сенга тўпни узатиш вақти келди», — деди француз ва тўпни аргентиналик томон думалатди.

«Бу — мен учун катта бахт. Сени қанчалик қадрлашимни биласан. Бирга бўлмаса-да, лекин бир-биримизга қарши бироз ўйнадик. Кейин сен мураббий, мен эса футболчи бўлганимда учрашдик.

Сени доим ҳурмат қилганман ва футболчиликдан кейин давом этаётган фаолиятингга ҳам қойил қоламан», — дея жавоб берди Месси.