Криштиану Роналду Осиё Чемпионлар лигаси 4-тури доирасида Қатарнинг «Ад-Дуҳайл» клубига қарши ўйинда майдонга тушмайдиган бўлди. «Ан-Наср» бош мураббийи Луиш Каштру бу ҳақда маълум қилган.

«Криштиану Роналду «Ад-Дуҳайл» билан ўйинни ўтказиб юборади. У жуда кўп ўйинларда майдонга тушиб, чарчади. Қатарда уни майдонга тушишини кутаётганлар жуда кўплигини биламан, аммо у дам ҳам олиши керак. У ўйинга тайёр эмас, аммо бизда бошқа юлдуз ўйинчилар бор.

Криштиану Роналдудек афсонани мен таркибдан четлатганим йўқ, вазият шуни тақозо этади. Ахир, у 48 соат олдин ўйинда майдонга тушди ва бунгача ҳам 120 дақиқа тўп суришига тўғри келганди», - дейди Каштру.

Маълумот учун, «Ан-Наср» 9 очко билан гуруҳда пешқадамлик қилмоқда. Қатар клуби эса 1 очко билан 3-ўриндан жой олган.

Аввалроқ, Қатардаги ўйинда мухлислар «Ан-Наср» таркибидаги Роналдуни кўриш учун 50 АҚШ долларидан чипта сотиб олишга соатлаб навбатда тургани хабар қилинганди.