«Барселона» «Фейеноорд» ҳужумчиси Сантьяго Хименесга қизиқиш билдирмоқда.

ESPN маълумотларига кўра, «кўк-анорранглилар» 22 ёшли форвардни 2022 йил ёзидан — футболчи Мексиканинг «Крус Асул» жамоасидан Нидерландия клубига ўтганидан бери кузатиб келишмоқда.

Сўнгги ҳафталарда каталонияликларнинг Хименесга қизиқиши кучайган. «Барселона» ҳужумчининг Европа футболига тез мослашганидан ҳайратда ва мексикалик ўйинчини Луис Суаресга қиёсламоқда. 

Таъкидланишича, Хименеснинг яқин вақт ичида «Барселона»га ўтиши истисно қилинмоқда ва келажакда клубнинг ҳаракатлари молиявий ҳолатга боғлиқ бўлади. Каталонияликларнинг яқин келажакдаги устувор вазифаси — Витор Рокенинг трансферини якунлаш, шунингдек, яримҳимоячи билан шартнома имзолаш ва ҳимоя қанотларини кучайтириш.

Бундан ташқари, «Фейеноорд» форвард учун катта сумма сўрайди.

2023/24 йилги мавсумда Сантьяго Эредивизининг 10та ўйинида 13та гол уриб, жамоасининг энг яхши тўпурари бўлиб турибди.