«Барселона» бош мураббийи Хави Ла Лига 11-туридан ўрин олган «Реал» (1:2) билан ўйиндан сўнг ўз фикрларини билдирди. 

«Жуда ачинарли, чунки ўйин учун режалаштирганимиз амалга ошганди. Бундан яхшисига лойиқ эдик. «Реал»нинг ғалабаси адолатсиз.

Бу баҳсда олдинга қадам ташладик. Кўпроғига лойиқ эдик. Лекин бу — футбол. Ўйин охирида омадсиз эпизод ва жуда ёмон натижа.

Ўз уйингда мағлуб бўлсанг, бу мамнуният келтирмайди. Биз хафамиз, лекин олдинга интилишимиз керак.

Рақиб юқори босим ўтказганда, тўпни кўпроқ назорат қилишимиз ва хотиржамроқ бўлишимиз керак эди. Аммо сўнгги 25 дақиқада шу жиҳат етарли бўлмади.

Жамоамизга гол уриш учун 5-6та имконият керак. «Реал»да 2та гол учун 3та вазият бор эди. Ўйиннинг қисқача мазмуни қуйидагича: биз 60 дақиқа яхши ўйнадик ва 1та гол урдик, рақиб 25 дақиқа яхши ўйнаб, 2та гол уришга муваффақ бўлди. Тўғрисини айтсам, агар кимдир бу ўйинда ғалаба қозониши керак бўлса, бу биз эдик.

Гавининг ҳимоядаги вазифалари тўпларни ютиб олиш эди. Рақиб бизнинг дарвозамизга тез-тез зарба бера олмади. Беллингҳэм иккита вазиятдан унумли фойдаланди. Ўйлайманки, жамоамиз яхши ўйин кўрсатди.

«Реал» дурангдан хурсанд бўлади, деган туйғу бор эди. Ҳаммаси шу натижа томон кетаётгандек туюлганида, омадсизлик юз берди», — дея каталонияликлар устозининг сўзларини келтиради Marca.