«Реал» Карим Бензема билан хайрлашув ўйинини ташкил қилиши мумкин.

Ҳужумчи шу ёзда «қироллик клуби»ни тарк этиб, «Ал Иттиҳод»га ўтганди. Француз фаолиятининг 14 йилини мадридликлар сафида ўтказди.

Маrca хабарига кўра, «Реал» Бензема ҳурмати юзасидан «Сантьяго Бернабеу»да «Ал Иттиҳод»га қарши ўртоқлик ўйини ўтказишни режалаштирмоқда.

Қайд этилишича, форвард «Реал»даги собиқ шериклари ва клуб раҳбарияти билан илиқ муносабатда. Шу билан бирга, Каримнинг келажакда Европа футболига қайтиш нияти йўқ.

Бензема «Реал»даги фаолияти давомида 25та соврин, жумладан, 5 бор Чемпионлар Лигаси кубогини ютган. 2022 йилда «Олтин тўп»ни қўлга киритган. 

35 ёшли футболчи «қаймоқранглилпр» сафида 353та гол урган ва клуб тарихидаги энг яхши тўпурарлар рўйхатида Криштиану Роналдудан кейин 2-ўринни эгаллаб турибди.