«Барселона» сўнгги йилларда амалга оширган трансферлар учун 200 миллион евродан кўпроқ маблағ тўлаб бериши лозим. Бу ҳақда Diario Sport хабар бермоқда.

Нашрнинг ёзишича, бу қарздорликнинг асосий қисми 2022 йилда амалга оширилган трансферлардан қолган. Ўшанда Каталония клуби молиявий қийин вазият сабабли аксарият трансферлар учун тўловни кейинроққа қолдиришига тўғри келган. Клубнинг қисқа муддатли қарздорлиги 89 млн еврони ташкил этиб, бу маблағ жорий мавсумда тўланиши лозим. Қолган 118 миллион евро маблағ эса узоқ муддатли саналиб, кейинги мавсумлар давомида тўланадиган қарздорликдир.

Ёзилишича, бу борада энг кўп қарздорлик «Лидс»дан – Рафинья учун бу йил 24 млн, келаси йилларда эса қолган 38 млн евро тўланади.

Роберта Левандовски учун ҳам «Бавария»га 10 миллион евро жорий йил якунигача, қолган 21 миллион келаси мавсумларда тўлаб берилиши белгиланган.

2022 йилнинг январида сотиб олинган Ферран Торрес учун эса бу йил «Сити»га 13 миллион евро, келаси йиллар давомида қолган 26 миллион евро тўланади.

Шунингдек, «Севилья»га ҳам Жюл Кунде учун бу йил 11 млн евро, келаси йиллар давомида эса 24 миллион евро тўланиши керак.

Қайд этилишича, Каталония клуби 2019 йил «Аякс»дан сотиб олинган Френки де Йонг учун ҳам қолган 16 миллион еврони ҳамон тўлаб бермаган. Клуб коронавирус пандемияси ортидан юзага келган молиявий қийинчиликлар сабабли белгиланган трансфер тўловларини ўз вақтида тўлашни кечиктиришга мажбур бўлган.