«Барселона» бош мураббийи Хави ЕЧЛ 1-туридан ўрин олган «Антверпен»га қарши баҳсдан (5:0) сўнг ўз фикрлари билан ўртоқлашди. 

Каталония клуби 3 кун аввал Ла Лигада «Бетис»ни ҳам 5:0 ҳисобида мағлуб этганди. 

«Жуда хурсандман, қониқиш ҳосил қилдим. Нафақат 5:0 ҳисоби, балки ўйиннинг ўзидан ҳам. Бугунги ва шанба кунги ўйинлар — менинг бу ердаги фаолиятим давомида савия жиҳатидан энг яхшилари. Шундай бўлиши керак.

Янги келганлар келиб, умумий савияни кўтаришди, лекин умуман жамоа ҳам яхшиланди. Бу жамоа билан фахрланаман, лекин барқарорликка эришишимиз керак.

Канселу ва Гундўған бизга ўхшаш ўйин кўрсатадиган мураббий билан ишлашган. Уларнинг ўйинларини томоша қилиш ёқимли, ўз ролини жуда яхши тушунадиган ва ундан завқланадиган Фелиш каби.

Энг муҳими, бу даражани, концентрацияни, шижоатни сақлаб қолишдир. Жамоа завқланмоқда. Ўтган йили бизга яхшироқ позицион ҳужум етишмади, аммо энди буни тўғирладик.

Ван Боммел (рақиб устози) бизда жуда яхши жамоа борлигини айтди ва мен ҳаммаси яхши кетяпти, деб жавоб бердим», — дея каталонияликлар устозининг сўзларини келтиради Marca.