Ўзбекистон U-23 миллий жамоаси бош мураббийи Темур Кападзе Осиё Кубоги саралаши доирасида Эрон U-23га (1:0) қарши ўйиндан сўнг ўз фикрлари билан ўртоқлашди. 

«Ҳаммани чиройли ғалаба ва кейинги босқичга чиққанимиз билан табриклайман. Бизни қўллаб-қувватлаган барча мухлисларга раҳмат айтаман. 
Афғонистон ва Ҳонгконгни осонлик билан ендик. Албатта, Эроннинг кучли эканлигини билардик. Шундай бўлса-да, йигитлар ҳамма нуқтада яхши ҳаракат қилишди. Ўйин давомида рақибга  ҳеч қандай имкон бермадик. 

Ҳисоб очилгач, аксинча, бизда кўп имкониятлар бўлди. Вазиятлардан фойдаланганимизда ўйинга эртароқ нуқта қўйишимиз мумкин эди. 

Имконият бўлганида Осиё ўйинларида ҳам шу таркибимиздан фойдаланган бўлардик. ФИФА кунлари бўлмагани учун кўп легионерларимиз ёрдам бера олмайди. Клублар билан алоқадамиз. Шу ердаги жамоалар билан келишганмиз. Кимни олиб кетамиз, кўрамиз. Энди Осиё ўйинларига тайёргарликни бошлаймиз. 

Клубларимиз 2та футболчига боғланиб қолмаган, деб ўйлайман. Уларни ўрнини тўлдирадиган яхши ўйинчилар бор. 

Осиё ўйинлари учун таркиб рўйхати бир йил олдин шакллантирилган. Биз ўшандан фойдаланишимиз керак бўлади. Афсуски, катта ёшли футболчилардан фойдалана олмаймиз.

Осиё ўйинларида чемпион бўлишга ҳаракат қиламиз. У ерда график бошқачароқ бўлади. Ватанимизга чемпион бўлиб қайтиш ниятидамиз. 

Ҳусановга икки бор сариқ кўрсатилгани? Мени уни тушунмай қолдим. Балки, бошқасига берилгандир ёки ҳакам хато қилгандир. Ҳакам бу ўйинга мос ҳакамлик қилмади, деб ўйлайман. Кўп камчиликлар кўзга ташланган бўлса-да, Худога шукур, ғалабага муносиб экалигимизни исботладик», — дея мураббийнинг сўзларини келтиради Tribuna.uz мухбири. 

Эслатиб ўтамиз, Ўзбекистон олимпия жамоаси саралашдаги учала ўйинни ҳам ютиб, келаси йил Қатарда бўлиб ўтадиган қитъа чемпионатига йўл олди.