ФИФА кунлари доирасида АҚШда ўқув-машғулот йиғини ўтказишни режалаштирган Ўзбекистон миллий жамоаси Сент-Луисга етиб боргунга қадар кутилмаган муаммоларга дуч келди.

Tribuna.uz манбасига кўра, Ўзбекистон миллий жамоаси делегацияси 5 сентябрь куни Тошкентдан Истанбул орқали Америкага етиб бориши белгиланган эди. Аммо Тошкент – Истанбул рейси 1,5 соатга кечиккани сабабли миллий жамоа ўша куни Истанбул – Атланта рейсига улгурмаган. 

Туркияда бир кун меҳмонхонада қолишга мажбур бўлган Ўзбекистон миллий жамоаси 6 сентябрь куни АҚШга жўнаб кетган. Истанбул – Атланта йўналишида 12 соат парвоз қилган футболчилар Атлантадан яна 2 соат парвоз қилиб, 900 километр узоқликдаги Сент Луис шаҳрига етиб борган. Бироқ аксарият футболчиларнинг багажлари рейслар алмашганда йўқолган. 

Аммо шу куни миллий жамоа делегацияси Туркиядан Сречко Катанецсиз учишга мажбур бўлган. Сабаби словениялик мураббий фаолияти давомида Ироқ ва Эронда бир неча марта бўлгани боис, паспорт назорати пайтида АҚШга учадиган самолётга киритилмаган. 

9 сентябрь куни АҚШ миллий жамоасига қарши ўртоқлик ўйини ўтказадиган вакилларимиз куни кеча Миссури штатидаги дастлабки машғулотини бош мураббийсиз ўтказди. Истанбулда икки кун қолиб кетган Сречко Катанец бугун, 8 сентябрь куни Истанбул – Атланта – Сент Луис рейси орқали миллий жамоа йиғинига қўшилиши кутилмоқда. 

Қайд этиш жоиз, Америкага сафар билан боғлиқ бундай воқеа фақат Катанец билан рўй бергани йўқ. «Барселона» бош мураббийи Хави ҳам Қатардаги фаолияти давомида Эронда бир неча марта бўлгани туфайли 2022 йилнинг ёзида АҚШга клуби билан бирга йўл ололмаган, 3 кунлик сарсонгарчиликдан сўнг «Барса»нинг йиғинига бориб қўшилганди.

Маълумот учун, Ўзбекистон миллий жамоаси мезбон АҚШга қарши майдонга тушади. Ўртоқлик ўйини 9 сентябрдан 10 сентябрга ўтар кечаси, Тошкент вақти билан соат 02:30да бошланади. 13 сентябрь тонгда эса Атланта шаҳрида Мексика миллий жамоасига қарши ўйин ўтказади.