ОКМК клуби яримҳимоячиси Абдулла Абдуллаев фаолиятини Бирлашган Араб Амирликларида давом эттиради.

Олмалиқ клуби матбуот хизмати хабарига кўра, Ўзбекистон миллий жамоаси яримҳимоячиси «Хорфаккан» жамоасига трансфер қилинган.

«Клубимиз ўз тарихида илк бор хориж клубига футболчисини трансфер қилди. Узоқ давом этган музокаралардан сўнг ОКМК ва «Хорфаккан» футбол клублари ўртасида, шунингдек футболчининг розилиги асосида трансфер шартномаси имзоланиб, Абдулла Абдуллаев БАА клубига кўчиб ўтди. Абдуллаевга жамоамиз муваффақиятларига қўшган ҳиссаси учун миннатдорчилик билдириб, унинг кейинги фаолиятига омад ва зафарлар тилаймиз!», - дейилади клуб хабарида.

Маълумот учун, «Бунёдкор» клуби тарбияланувчиси саналмиш 26 ёшли футболчи жорий мавсум ОКМК сафида Суперлигада 18 ўйинда 2та голга муаллифлик қилган. «Хорфаккан» БАА чемпионатида 2-турдан кейин 3 очко билан 8-ўринда бормоқда.