«Реал» ҳимоячиси Дани Карвахаль шу ёзда Килиан Мбаппени Мадрид жамоаси сафига қўшилишига ишонганини айтди.

«Килианнинг келиши жамоа ичида кўп муҳокама қилинмади, аммо мавсум олди йиғинда турли фикрлар янграб турганди. Кимдир «келса керак» деган бўлса, бошқаси «келмайди шекилли», деди.

«ПСЖ» Япониядаги турне олдидан Мбаппени таркибдан четлатганидан сўнг, уни «Реал»га келади деб ўйлагандим. Чунки Килиан учун ҳам «Реал» энг яхши вариант эди. Ўша пайтда унинг жамоамизга қўшилиши яқиндек туюлганди. Кейин эса ҳаммаси чигаллашиб кетди ва у келмади», - дея испаниялик футболчининг сўзларини келтиради Relevo.

Маълумот учун, Килиан Мбаппенинг Париж клуби билан амалдаги келишуви 2024 йилнинг ёзида якунига етади. У Франция жамоаси сафини эркин агент сифатида тарк этиши кутилмоқда.