Нидерландия миллий жамоаси собиқ бош мураббийи Луи ван Галнинг фикрича, ЖЧ-2022да унинг бошқарувидаги жамоанинг чоракфиналда Аргентинага мағлубиятга учраши аввалдан режа қилинган.

Қатардаги турнирда ғолиб бўлган Аргентина миллий жамоаси ЖЧ-2022 чоракфиналида Нидерландия билан 2:2 ҳисобини қайд этган, пенальтилар сериясида эса 4:3 ҳисобида устун келганди.

«Аслини олганда бу ҳақда кўп гапиришни истамайман. Аммо Аргентинанинг ўшанда қандай голлар ургани-ю, биз эса қандай голлар урганимиз ва аргентиналик ўйинчиларнинг қуюшқондан чиққанига қарамай жазосиз қолдирилгани сабабли, бунинг ҳаммаси аввалдан режалаштирилган бўлган деб ўйлайман. 

Мен айтганларимни назарда тутяпман. Месси жаҳон чемпиони бўлиши керак эдими? Ҳа, ўйлашимча шундай», - дея жавоб қайтарган 72 ёшли мутахассис.

Эслатиб ўтамиз, Аргентина яримфиналда Хорватияни (3:0), финалда эса Францияни (3:3, 4:2) мағлуб этиб, жаҳон чемпионлигини қўлга киритган эди. Месси финалда дубль қайд этганди.