Саудияликларнинг ақл бовар қилмас харидларига қарамай, Англия клублари етакчиликни ўзида сақлаб қолди. Шу билан бирга, кучли ўнликдан Саудиянинг бирданига уч клуби жой олди.
30 август куниёқ бир трансферлар ойнасида сарфланган маблағлар миқдори кўплиги бўйича жаҳон рекорди янгилаб бўлинганди. Шу куни бу 7,631 млрд еврога етди, бу эса 2019 йил ёзидагидан 50 млн еврога кўпроқ эди. Кейинги кунларда ҳам ўнлаб трансферлар амалга ошди. Қолаверса, Саудия Арабистонида ойна 7 сентябргача очиқ қолади. Қуйида бу ёзда янги футболчилар учун энг кўп маблағ сарфлаган клублар келтириб ўтилади.
«Ан-Наср» (165 млн евро сарфлади)
Дастлаб Криштиану Роналдуни сафига қўшиб олган ушбу клуб ҳам Европадаги юлдузлар савдосида иштирок этди. Улар «Бавария»дан Садио Манени, «Сити»дан Эмерик Лапортни, «Интер»дан Марсело Брозовични олиб келишди. Аммо энг қимматбаҳор харид португалиялик вингер Отавио бўлди, унинг трансфери учун 60 млн евро тўланди. «Порту» бу сотувдан мамнун экани тайин, Transfermarkt порталида ушбу 28 ёшли футболчининг баҳоси 35 млн евро деб кўрсатилган.
«Ливерпул» (172 млн евро сарфлади)
Клуб трансферлар ойнасининг сўнгги кунида энг кўп харажат қилган клублар ўнлигига кириб олди. Бу «Бавария»дан 40 млн евро эвазига Райан Гравенберҳ сотиб олингани туфайли бўлди. Бунгача мерсисайдликлар Доминик Собослаи, Алексис Мак Аллистер ва Ватару Эндо трансфери билан кифояланганди. Ёзда қатор етакчилари билан хайрлашган клуб учун бу у қадар муваффақиятли ойна бўлмади, аммо ушбу таянч яримҳимоячисининг келиши вазиятни анча яхшилади. Клуб бу мавсумда яна совринлар учун курашишга тайёр.
«Ал-Аҳли» (184 млн евро сарфлади)
Саудия Арабистонининг ушбу клуби ҳам Европада диққат марказида турди. Улар катта пул эвазига (40 млн евро) Испания чемпионатидан қитъанинг умидли ёшларидан бири – Габриэл Вейгани олиб кетишди. Ушбу йигитча 21 ёшида Яқин Шарққа йўл олди ва бунинг учун эринмаган одам уни танқид қилди. Лекин у уч йиллик шартнома учун Европадагидан бир неча баробар кўпроқ маош олади. Қолаверса, саудияликлар «Сити»дан сотиб олган Риёз Маҳрез (35 млн евро) ва «Рома»дан олиб келган Рожер Ибанес (30 млн евро) билан бирга тўп суради. Бу клуб олдинроқ Мерих Демирал, Эдуард Менди, Франк Кессие каби юлдузларни ҳам сафга қўшиб олганди.
Бу клуб ташкил топганидан буён трансферлар учун 120 млн евро атрофида маблағ сарфлаганди, 2023 йил ёзининг ўзида 184 млн евро харажат қилди.
«Манчестер Юнайтед» (207 млн евро сарфлади)
«МЮ»да ҳам фақат учта катта харид бўлди. Асосийси – Расмус Ҳойлунд. Уни биринчи мавсумдаёқ лига тўпурарига айланган Эрлинг Ҳоланд билан кўп солиштиришади. Скандинавиялик бу футболчи учун 75 млн евронинг баҳридан ўтилди. Дастлабки турларни жароҳати туфайли ўтказиб юборган футболчи фақат 4-турга келиб, «Арсенал»га қарши сафар ўйинида захирадан майдонга тушди ва барчада яхши таассурот қолдирди. Мэйсон Маунт эса «Челси»дан 64 млн евро эвазига харид қилинганди, Дэвид де Хеа кетганидан кейин бўш қолган дарвоза чизиғи 52 млн евро эвазига «Интер»дан сотиб олинган Андре Онана билан ёпилди. Трансферлар ойнасининг сўнгги кунида эса муаммоли таянч зонаси учун «Фиорентина»дан Софян Амрабат ижарага олинди. Қолган трансферлар у қадар аҳамиятли эмас.
«Арсенал» (235 млн евро сарфлади)
Лондонликларда ҳам фақат учта йирик трансфер. Лекин бири рекорд даражада. Бу ёзда ҳеч бир клуб бир футболчи учун 116,6 млн евро сарфламади. Фақат Кайседо учун рақобатда устун келган «Челси» бунга яқин келди. «Арсенал» бу пулларга Деклан Райсни сафга қўшиб олди. У клубнинг асосий футболчисига айланмоқда ва «МЮ»га қарши ўйинда қўшимча дақиқаларда ғалаба голини урди. Шунингдек, 75 млн евро эвазига «Челси»дан Кай Ҳаверц олиб келинди, немис футболчиси ёзда «Байер» сафига ўтиб кетган Гранит Жаканинг вазифаларини ўзига олган. «Аякс»дан 40 млн евро эвазига нидерландиялик ҳимоячи Юрриен Тимбер сотиб олинганди, аммо у илк турдаёқ жароҳат олиб, мавсум охирига қадар сафдан чиқди. Шунингдек, «Брентфорд» дарвозабони Давид Райя кейинроқ сотиб олиш шарти билан ижарага олинган.
Микел Артета бундай трансферлар билан биринчи навбатда икки фронтда - АПЛ чемпионлик пойгаси ва Чемпионлар лигасида муносиб қатнашишни кўзлаган.
«Манчестер Сити» (241 млн евро сарфлади)
Ўтган мавсум якунларига кўра требл қайд этган жамоа бошқалардан қолишмади. «Шаҳарликлар» ҳам кам бўлса-да, кучли трансферлар амалга оширишди: Йошко Гвардиол учун 90 млн евро («Лейпциг»), Матеус Нунес учун – 62 млн евро («Вулверҳемптон»),Жереми Доку учун – 60 млн евро («Ренн») тўланди. Қолаверса, трансферлар ойнаси бошидаёқ «Челси»дан 29 млн евро эвазига Матео Ковачич олиб келинганди.
«Тоттенҳэм» (249 млн евро сарфлади)
«Тоттенҳэм» бозорда муваффақиятли ишлади. Энг йирик трансфер – Бреннан Жонсон учун «Ноттингҳем»га 55 млн евро тўланди. Яна 40 млн евро атрофидаги нархларга уч футболчи сотиб олинди: «Лестер»дан Жеймс Мэддисон, «Спортинг»дан – Педро Порро, «Волфсбург»дан – Микки ван де Вен. Шунингдек, «Ювентус»дан ижарага олиб ўйнатилган Деян Кулушевскининг трансфер ҳуқуқи сотиб олинди (30 млн евро). Ҳарри Кейн «Бавария»га сотилган ҳолатда бундай харажатлар ажабланарли эмас. Шу билан бирга, марказий ҳужум чизиғига фақат Алехо Велис сотиб олинди - «Росарио»га 15 млн евро тўланди.
«ПСЖ» (349 млн евро сарфлади)
Бу рўйхатда учинчи ўринни кутилмаганда «ПСЖ» эгаллади – АПЛ ва Саудия Арабистони вакили бўлмаган ягона клуб. Улар маблағларни режасиз сарфламади, аммо саволлар туғдирадиган ҳолатлар ҳам бор. 60 млн евро эвазига таянч зонаси учун Мануэл Угарте олиб келинди – муаммоли чизиқни ёпиш учун яхши трансфер. Ундан ташқари, «Барса»дан Усмон Дембеле (50 млн евро), «Бавария»дан – Лукас Эрнандес (45 млн евро) келди. Клуб чиндан ҳам зарур позицияларни кучайтирди. Сўнгги кунда эса «Айнтрахт»га ҳужумчи Рандал Коло Муани учун 95 млн евро тўланди.
«Ал-Ҳилол» (353 млн евро сарфлади)
«Ан-Наср» энди таркибида Роналду борлигига қарамай Саудия Арабистонининг энг кучли клуби эмас. «Ал-Ҳилол» ёзги трансферлар кампаниясини жуда кучли ўтказди. «ПСЖ»дан Неймарни олиб келиш учун 90 млн евро атрофида маблағ сарфланди. Иккинчи ўринда – «Зенит»нинг собиқ ҳужумчиси Малком. Питерликлар бу бразилиялик футболчиси учун 60 млн евро ишла олди. Шунингдек, Александар Митрович, Рубен Невеш, Сергей Милинкович-Савич ва Калиду Кулибали каби юлдузлар ҳам бор.
«Челси» (464 млн евро сарфлади)
Ёзнинг сўзсиз етакчиси. Америкалик бизнесмен Тодд Боули бошқарувига ўтган клубда фақат унинг ўзига тушунарли бўлган қайта қуриш ишлари давом эттирилмоқда. Ўтган ёзда «Челси» бирданига икки жаҳон рекордини янгилаганди: бунгача ҳеч ким бир мавсум доирасидаги икки трансфер ойнасида 611 млн евро ва қишки трансферларнинг ўзида 330 млн евро сарфламаганди.
Энди эса яна бир рекорд ўрнатилди: 464 млн евро - янги тарихий рақам, ҳеч бир клуб ҳали трансферлар ойнасида бунча харажат қилмаган. Клубга ёзда 17 футболчи келди, шундан олти нафари ижарадан қайтган, 11 нафари сотиб олинган.
Шу билан бирга, клуб футболчилари сотувидан 264,2 млн евро ишлаб, одатда «Аякс», «Бенфика», «Аталанта», «Брайтон», «Спортинг» ва «Монако» каби клублар эмас, айнан лондонликлар сотувлардан энг кўп маблағ ишлаган жамоага айланди.
Клубнинг энг катта харидлари – Мойсес Кайседо ва Ромео Лавиа, шунингдек ҳужумчи Кристофер Нкунку бўлди. Улар учун сарфланган маблағнинг ярми тўғри келади – 248 млн евро.
