«Ювентус» бош мураббийи Массимилиано Аллегри А Серия 3-туридан ўрин олган «Эмполи»га (2:0) қарши ўйиндан сўнг ўз фикрларини билдирди. 

«Қийин рақиб «Эмполи»га қарши яхши ўйин ўтказдик. Уларга вазият яратишга деярли йўл қўймадик, лекин ўзимиз майдоннинг учинчи қисмида хотиржамроқ бўлишимиз керак, сўнгги пасларда жуда асабиймиз. Бу вақт ўтиши билан яхшиланадиган жиҳатдир.

Чемпионлар Лигасини ўтказиб юбориш ҳеч кимга ёқмайди. Жадвалда 3-ўринни эгаллагандик. «Ювентус» ўтган мавсум омадсизликка учраганини айтиш осон, лекин очколар олиб қўйишмаганида биз учинчи бўлардик.

Лигада скудетто учун курашишга яхшироқ тайёрланган жамоалар бор: «Интер», «Милан», «Наполи». Биз улар билан тенглашиб, кучли тўртликка киришга ҳаракат қилишимиз керак.

Нимадир юз бериши мумкин ва биз скудетто учун курашга киришамиз, аммо фаворитлар қаторидамиз, дея олмаймиз.

Мураббийнинг ақли унинг ихтиёрида қандай футболчилар борлигини тушунишда намоён бўлади. Танкка қарши тўппонча билан чиқиш мумкин эмас, бошқа стратегия керак. Бу мавсум бизда унчалик тажрибали ўйинчилар йўқ, лекин ҳамманинг оёқлари бор. Арьедо Брайда айтганидек, футболда доим югуриш мажбурий эмас, лекин бу ёрдам беради.

Ҳаммаси жуда оддий демоқчи эмасман, чунки бу ҳаммага ҳам ёқмаслигини биламан, лекин шуни айтаманки, қоғозда оддийдек кўринган нарсалар одатда қийинроқ бўлади», — деди туринликлар устози Sky Sport Italia эфирида.