ОЧЛ-2023/24 плей-офф гуруҳ босқичига ўтиш ўйинида «Навбаҳор» Қатарда «Ал-Вакра» жамоасини мағлуб этиб, илк марта Осиё Чемпионлар лигаси гуруҳ босқичига йўлланма олгач, бош мураббий Самвел Бабаян ва жамоа садори Ўткирбек Юсупов вилоят ҳокими Шавкат Абдураззоқовни табриклашди.

«Шавкат Шокиржонович, мана ваъда қилганимиздек туғилган кунингизга чин дилдан совға қилдик. Чемпионлар лигаси мадҳиясини Наманганга олиб келдик. ИншаАллоҳ, бундан кейин ҳам юзингизни ёруғ қиламиз», - дейди жамоа номидан Ўткирбек Юсупов.

«Шавкат Шокиржонович табриклаймиз! Сиз уч кун ичида деган эдингиз, мана учинчи кунда биз байрам уюштирдик. Бизнинг вазифамиз Наманганга ОЧЛ мадҳиясини янгратиш эди. Биз буни уддаладик. Энди йўлимизда давом этамиз. Қўллаб-қувватлаш учун раҳмат», - дейди Самвел Бабаян.

Эслатиб ўтамиз, «Навбаҳор» ОЧЛ гуруҳ босқичига қуръа ташлаш олдидан 4-саватчадан жой олади. Қуръа маросими 24 август куни бўлиб ўтади.