2006 йилги мундиалдан кейин энг кўп муҳокама қилинган воқеалардан бири Криштиану Роналду ва Уэйн Руни орасидаги зиддият бўлганди. Матбуот янги мавсумда бу тандем биргаликда тўп суриши мумкинлигига ишонмас, ҳатто Алекс Фергюсон ҳам кейинчалик, бу икки футболчи орасидаги муносабат тикланишига ишонмаганини таъкидлаб ўтган. Ёз бўйи Роналдунинг Англияни тарк этиши мумкинлиги муҳокама қилинган ва янги клуб изланганди. Аслида муаммонинг ечими биз ўйлагандан анча эрта ва оддий шаклда ҳал бўлган экан.
Нима бўлган эди?
ЖЧ-2006 чорак финалида Англия ва Португалия миллий жамоалари тўқнаш келдилар. «МЮ» футболчилари: Роналду Португалия сафида, Руни эса ўз ватандошлари билан Англия шарафини ҳимоя қилаётганди. Ўйиннинг 61-дақиқасида Карвальо билан тўп учун кураш пайтида Руни ётган рақибини босиб олади. Дарҳол Криштиану вазиятга аралашиб, ҳакамдан Рунини жазолаш кераклиги талаб қила бошлайди. Руни клубдошини итариб юборади – қизил карточка. Ўшанда кадрга Роналдунинг захира ўриндиғига қараб кўзини қисиб қўйгани ҳам тушиб қолганди.
Хуллас, Англия клубида ўйнайдиган Криштианунинг провакацияси туфайли Англия бир футболчи кам қолди ва якунда пенальтилар сериясида мағлуб бўлди. Табиийки, ҳали инглиз фанатлари нафратига учраши аниқ бўлган Роналдунинг Руни билан ҳам зиддияти пайдо бўлди. Гўёки, ечими йўқ муаммо.
Роналду-Руни тандеми
Айтиш мумкинки, Роналдунинг футболда омади чопган. Агар футболни дақиқ тушунадиган ва жамоавий ўйин учун ўз услубини қурбон қилишга тайёр бўлган 21-асрнинг энг яхши ҳужумчилари ҳақида сўралса, шубҳасиз Руни ва Бензема алоҳида эътироф этилади. Қарангки, ҳар иккиси ҳам ўз вақтида Криштиану билан тандем сифатида тўп сурди, португалиялик юлдузнинг шундай чўққига чиқишига ўз ҳиссаларини қўшишди. Роналду кетгач, Руни ҳам, Бензема ҳам тўпурарлик қобилиятини намойиш эта бошлашгани ҳам яққол далил.
Хуллас, Роналду Манчестерга 2003 йилнинг ёзида, Руни эса бир йил ўтиб келган. Ўша пайтларда олдинги чизиқда асосий урғу Рууд ван Нистелройга қаратиларди. Табиийки, табиатан анча худбин бўлган Рууд ёш футболчиларнинг фақат ўзининг голлари учун ёрдамчи бўлишини истарди. Ниҳоят 2006 йилга келиб, Фергюсон Руни ва Роналду етарлича улғайганини тушуниб етади ва Рууднинг кетишига тайёргарлик кўра бошлайди. Бунинг устига натижалар ҳам пасая бошлаган – «Манчестер Юнайтед» АПЛ тарихида илк маротаба қаторасига уч йил чемпион бўла олмаётганди.
Умуман бемаврид паллада жаҳон чемпионатида мана шундай кутилмаган муаммо.
Зиддиятнинг барҳам топиши
Яқин пайтларгача бу мавзу ҳақида бошқача фикрлар кўп бўлган. Фергюсон автобиографиясида Руни интервью бериб миш-мишларга барҳам бермоқчи бўлганини ҳам ёзади, демак, ўша пайтда маълум муддат воқеа тўлиқ очиқланмаган. Оқибатда масала шиширилган, турли тахминлар билдирилган, шунинг учун ҳам ҳозиргача бу футболдаги катта зиддиятлардан бири сифатида тилга олиниб турилади.
Хабарларда Британия полицияси Роналдунинг Англияга қайтишига алоҳида тайёргарлик кўргани, Руни эса у билан эркакчасига гаплашиб олмоқчи экани чиқиб турарди.
«Рунини тушунаман. Агар у менинг жамоадошим бўлгани-да, жирканган бўлардим» – дейди Стивен Жеррард Роналду ҳақида.
Ўтган йилнинг февралида Amazon Уэйн ҳақида хужжатли фильм тақдим этди. Руни ўша кунги ҳиссиётлари билан ўртоқлашади:
«Мен ҳозирчага билмайман – нега ҳакам ўша вазиятгача фол белгиламади? Мен атайлаб Карвальони босиб олгандимми ёки йўқ. Ростанам билмайман. Ечиниш хонасига кириб, у ердаги бир нечта буюмни синдирдим. Телевизор қаршисида ўйиннинг давомини томоша қилганимни эслайман. Бу ҳаётимдаги энг ёлғиз паллам эди. Тушуниб турибман, агар ютсак, яримфинал ва финални ўтказиб юбораман, агар ютқазсак, менинг айбим билан.
Роналдуга нисбатан муаммо бўлмаган. Ахир ўзим ҳам биринчи таймда унга сариқ карточка беришларини талаб қилгандим-ку. У Португалия учун ўйнайди, мен Англия учун. Ғалаба учун қўлдан келганини қилиш керак».
«Ўйин тугагач, Криштиану Роналду мени қидириб топди ва Руни билан учраштиришимни сўради» – деб эслайди «Манчестер Юнайтед» сардори ва Англия миллий жамоаси ҳимоячиси Рио Фердинанд. «У узр сўрамоқчи эди», - дейди у.
«Рио, мен ҳеч нарсани режалаштирганим йўқ эди. Ҳеч қачон унга нисбатан бундай қилмаган бўлардим. Ҳеч қандай ёмон ниятим йўқ эди. У менинг жамоадошим».
«Мен автобусга чиқиб, Рунига Роналду у билан кўришмоқчи эканини айтдим ва пастга олиб тушдим. Ҳеч нарса демадим. Мен сабабчи бўлдимми, уларнинг ўзлари келишиб олишдими, билмайман, лекин уларни ўшанда мен учраштириб қўйгандим», - дейди Рио.
Автобус олдидаги суҳбат ҳақида Руни эслайди:
«Криштиану жуда хижолатда эди. Мен унга: «менга қара, сенга ҳам, менга ҳам энди матбуот ташланади. Кел, яхшиси, қайтамиз ва Премьер-лигани ютамиз» – дедим. У хурсанд бўлиб кетди. Мен муваффақият қозонишни, совринлар ютишни истардим. Футбол ўйинининг асосий мазмуни шу».
Гап-сўзлар то чемпионат бошланиб, Роналду ва Руни бир-бирларига ассистлар амалга ошириб, голлар ургунча давом этди. Ўша йили бу икки ёш футболчи илк маротаба Англия чемпиони бўлдилар. Кейинги яна қаторасига икки АПЛ соврини, Чемпионлар Лигаси ғолиблиги ва ҳоказо.
Умуман Роналду ҳам, Руни ҳам бугундан қарасак, футбол тарихида ўчмас из қолдириб бўлдилар. Руни «Манчестер Юнайтед» тарихидаги тўпурар футболчи, АПЛ ва Англия миллий жамоаси голеадорларидан бири, Роналду умуман футболда асосий номлардан бири, бир нечта «Олтин тўп»лар соҳиби. Ҳар икки футболчи ҳақида кўп ёзилган, уларнинг истеъдоди, меҳнати, фаолияти ибрат ўлароқ кўп тилга олинган. Гап фақат бунда эмас.
Бу ҳикоянинг энг эътиборли жиҳати нимада? Қаранг, ўша пайтда Роналду ҳам, Руни ҳам 21 ёшда эдилар. Руҳий томондан, эндигина, бири ҳозиргина миллий жамоасининг мағлубиятига сабаб бўлиб ўтирибди, иккинчиси каттароқ босим остида, балким, севимли клубига қайтиб бора олмаслиги мумкин. Қийин вазият. Бу ёшда ҳар қандай ноўрин ҳаракатни кутиш мумкин улардан. Кўпгина тажрибали футболчилар, ҳатто мураббийлардан ҳам адекват қарорни кутиш қийин вазият. Аммо...
Бири муаммони иссиғида ҳал қилиш учун жамоадошидан узр сўрамоқчи, иккинчиси, хафа бўлиш ўрнига ҳали биргаликда совринлар ютиш мумкинлигини тушунган ҳолда, вазиятни ўнглашга ўринмоқда, шеригини юпатмоқда. Балким катта футболчи бўлиш калити шу атрофдадир...
Қаҳрамон Асланов