«Андижон» клуби ҳужумчиси Рубин Ҳебай фаолиятини Туркия Суперлигасида давом эттириши мумкин. Бу ҳақда клуб расмий сайти хабар берган.

«Айни пайтда Суперлигада 10та гол билан тўпурарлар орасида бораётган ва жорий мавсумда чемпионатимизнинг кашфиёт легионерларидан бири сифатида тилга олинаётган жамоамизнинг албаниялик ҳужумчиси Рубин Ҳебай яна барчанинг диққат-марказида. Боиси, унга хориждан кўз тикаётганлар пайдо бўлмоқда. 

Жумладан, Туркия Суперлигасида иштирок этаётган «Анкарагюджю», «Ризеспор» ҳамда «Аланьяспор» клублари Ҳебайга қизиқишяпти. Бу масала бўйича «Андижон» клуби бош директорига алоқага чиқишган ва турклар таклиф қилаётган трансфер суммаси «Андижон» клуби томонидан Ҳебайдек тўпурарга муносиб эмас, деб ҳисобламоқда», - дейилади клуб хабарида.

Маълумот учун, Туркияда трансфер ойнаси 15 сентябрда ёпилади. Рубин Ҳебай «Андижон»га жорий йил қишки трансфер ойнасининг сўнгги кунида қўшилган бўлиб, 2 йиллик шартнома имзоланган.